ಹೆಣ್ಣಿನ ಪಾತ್ರಗಳಲ್ಲಿ ಸೈ ಅನಿಕೊಂಡ ರಾಘವೇಂದ್ರ

ಮಂಜುನಾಥ ಗದಗಿನ

ಹೆಣ್ಣು ಗಂಡಾಗಿ ನಟಿಸಬಹುದು, ಆದರೆ, ಒಬ್ಬ ಗಂಡು ಹೆಣ್ಣಾಗಿ ನಟನೆ ಮಾಡುವುದು ನಟನೆಗೆ ಸವಾಲೊಡ್ಡುವ ಕೆಲಸ. ಆದರೆ, ಆ ಸವಾಲಯನ್ನು ಸಲಿಸಾಗಿ ನಿಭಾಯಿಸಿ ಹೆಂಗಳೆಯರು ನಾಚುವಂತೆ ನಟನೆ ಮಾಡಿ ಎಲ್ಲರ ಮನೆ-ಮನದ ಮಾತಾಗಿದ್ದಾರೆ. ಈ ನಟ.

ಹೌದು! ಅವರೆ ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಶಿರವಾಳ ಗ್ರಾಮದ ರಾಘವೇಂದ್ರ ಆರ್.ಕೆ. ಹಿಂದಿನ ನಾಟಕ ರಂಗಭೂಮಿಯಲ್ಲಿ ಮಡಿವಂತಿಕೆ ವಿಚಾರವಾಗಿ ಮಹಿಳೆಯರು ನಟನೆ ಮಾಡಲು ಹಿಂಜರಿಯುತ್ತಿದ್ದರು. ಅಂತಹ ಸಮಯದಲ್ಲಿ ಗಂಡಸರೆ ಹೆಣ್ಣಿನ ವೇಷ ಹಾಕಿ ನಟನೆ ಮಾಡುತ್ತಿದ್ದರು. ಅದು ಆಗಿನ ಅನಿವಾರ್ಯ ಕೂಡಾ ಆಗಿತ್ತು. ಏಣಗಿ ಬಾಳಪ್ಪನಂತಹ ಅಪ್ಪಟ ಕಲಾವಿದರು ಹೆಣ್ಣಿನ ವೇಷಗಳನ್ನು ಹಾಕಿ ಜನ ಮಾನಸದಲ್ಲಿ ಅಂದಿನ ಕಾಲದಲ್ಲಿ ಅಚ್ಚಳಿಯದೇ ಉಳಿದಿದ್ದರು. ಇಂಹತ ಪ್ರಯೋಗಗಳ ಮೂಲಕವೇ ರಂಗಭೂಮಿಗೆ ಮಹಿಳೆಯರ ಪ್ರವೇಶವಾಯಿತು. ಅಂದಿನ ಬುನಾದಿಯೇ ಇಂದಿನ ಆಡಂಭರದ ನಟನೆ ಹಾಗೂ ಚಲಚಿತ್ರಗಳಿಗೆ ನಾದಿಯಾಗಿದೆ. 

ಎರಡು ವರ್ಷದ ಹಿಂದೆ ನಟನೆ:

ರಾಘವೇಂದ್ರ ಅವರು ನಟನೆ ಆರಂಭಿಸಿ ಕೇವಲ ಎರಡು ವರ್ಷವಾಯಿತು. ಆರಂಭದಲ್ಲಿ ಇವರು ಡ್ರಾಯಿಂಗ್‌ನಲ್ಲಿ ಸಿದ್ಧ ಹಸ್ತರು. ಇದೇ ಕಾರಣಕ್ಕೆ ಚಿಕ್ಕ ವಯಸ್ಸಿನಲ್ಲೆ ಮನೆಯಲ್ಲೆ ತನ್ನೊರಿಗೆಯ ಹಾಗೂ ಮಕ್ಕಳಿಗೆ ಡ್ರಾಯಿಂಗ್ ಕಲಿಸಿಕೊಡುತ್ತಿದ್ದರು. ಆದರೆ, ಶಾಲೆಯಲ್ಲಿ ನಡೆಯುತ್ತಿದ್ದ ಪ್ರತಿಭಾ ಕಾರಂಜಿಯಂತಹ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುತ್ತಿದ್ದರು. ಈ ಸಮಯದಲ್ಲಿ ಹಲವು ವೇಷ-ಭೂಷಣಗಳನ್ನು ಹಾಕಿಕೊಂಡು ಸಭಿಕರ ಮನ ಗೆದ್ದಿದ್ದರು. ಅಷ್ಟೇ ಅಲ್ಲದೇ ಹಲವು ಬಹುಮಾನಗಳನ್ನು ತನ್ನದಾಗಿಸಿಕೊಂಡಿದ್ದರು. 9ನೇ ವಯಸ್ಸಿನಲ್ಲಿ ಉದಯ ಕಲಾವಿದ ಸಂಘದ ಮೂಲಕ ನಡೆಯುತ್ತಿದ್ದ ಒಂದು ನಾಟಕದಲ್ಲಿ ಇವರಿಗೆ ಭಸ್ಮಾಸುರನ ಪಾತ್ರ ದೊರೆಯಿತು. ಈ ಭಸ್ಮಾಸುರನ ಪಾತ್ರ ನೋಡಿ ನನ್ನ ಒಡನಾಡಿಗಳು ಭೇಷ ಅಂದರು. ನಿನಗೆ ನಟನೆ ಸಿದ್ಧಿಸಿದೆೆ, ಮುಂದೆ ನೀನು ನಟನೆಯಲ್ಲಿ ಮುಂದುವರೆ ಎಂದು ಸಲಹೆ ಕೂಡಾ ನೀಡಿದರು. ಹೀಗಾಗಿ ಡ್ರಾಯಿಂಗ್‌ನೊಂದಿಗೆ ನಟನೆ ಕೂಡಾ ಆರಂಭಿಸಿದೆ ಎಂದು ಹೇಳುತ್ತಾರೆ ರಾಘವೇಂದ್ರ.

ಮೊದಲ ಬಾರಿ ಸೆಲೆಕ್ಷನ್:

ರಾಘವೇಂದ್ರ ಅವರು ಯಾವುದೇ ತರಬೇತಿ ಸಂಸ್ಥೆಯಿಂದ ನಟನೆ ಕಲಿತ್ತಿಲ್ಲ. ಅದರ ಬದಲಾಗಿ ಸಣ್ಣಪುಟ್ಟ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡು ನಟನೆ ಕಲಿತ್ತಿದ್ದಾರೆ. ಆದರೆ, ಘಟಾನುಘಟಿ ನಟರ ಮುಂದೆ ಪ್ರದರ್ಶನ ನೀಡಿ ಸಾಗರದಲ್ಲಿ ನಡೆದ ಮಜಾಭಾರತ ಆಡಿಶನ್‌ನಲ್ಲಿ ಮೊದಲ ಯತ್ನಕ್ಕೆ ಸೆಲೆಕ್ಷನ್ ಆದರು. ಈ ವೇಳೆ ಅವರು ಕಲ್ಪನಾ, ಮಂಜುಳಾ, ಮತ್ತೀತ್ತರ ನಟರ ಮಿಮಿಕ್ರಿಯೆ, ಕುಡುಕನ ಪಾತ್ರ ಮಾಡಿದ್ದರು. ನಂತರ ಮಜಾಭಾರತ ಎಂಬ ಅಖಾಡದಲ್ಲಿ ತಮ್ಮದೇ ನಟನೆ ಮೂಲಕ ನಾಡಿನ ಹೆಂಗಳೆಯರು ನಾಚುವಂತೆ ನಟನೆ ಮಾಡಿ, ರಾಘು ಅಲಿಯಾಸ ರಾಗಿನಿಯಾಗಿ ಮಿಂಚಿದ್ದಾರೆ. ಮಜಾಭಾರತ ಆರಂಭದಲ್ಲಿ ಗಂಡಸರ ಪಾತ್ರಗಳಲ್ಲಿ ನಟನೆ ಮಾಡಿದರು. ಆದರೆ, ಆ ನಟನೆ ಅವರಿಗೆ ಅಷ್ಟೊಂದು ಯಶಸ್ಸು ತಂದು ಕೊಡಲಿಲ್ಲ. ಪಕ್ಕದ ಮನೆ ಪ್ರಸಾದ ಎಂಬ ದೃಶ್ಯದಲ್ಲಿ ಮಹಿಳೆಯ ಪಾತ್ರ ಹಾಕಿ, ಮಹಿಳೆಯರ ತರಹವೇ ಹಾವ-ಭಾವ, ಮಾತುಗಳನ್ನು ಹಾಡಿ, ರಾತ್ರೋ ರಾತ್ರಿ ಫೇಮಸ್ ಆದರು. ಅಂದಿನಿಂದ ಮಜಾಭಾರತ ಉದ್ದಕ್ಕೂ ಇವರು ಹೆಣ್ಣಿನ ಪಾತ್ರಗಳಲ್ಲೇ ನಟನೆ ಮಾಡಿದರು. ಅನಂತರ ಹಲವಾರು ಶೋ, ನಿರೂಪಣೆಗಳನ್ನು ಹೆಣ್ಣಿನ ಪಾತ್ರಗಳಲ್ಲೆ ನಿರ್ವಹಿಸಿ, ಬಹುತೇಕ ಹೆಣ್ಣು ಮಕ್ಕಳು ಮಾಡುವ ಪಾತ್ರಗಳನ್ನು ಕಸಿದುಕೊಂಡದ್ದು ಇವರ ಹೆಗ್ಗಳಿಕೆ. 

ಧಾರವಾಹಿಯಲ್ಲಿ ನಟನೆ:

ರಾಘವೇಂದ್ರ ಅವರ ಹೆಣ್ಣಿನ ಪಾತ್ರ ನೋಡಿದ ಪಾಪ ಪಾಂಡು ಧಾರವಾಹಿಯ ನಿದೇರ್ಶಕರು ಇವರನ್ನು ಕರೆದು ನೀವು ಹೆಣ್ಣಿನ ಪಾತ್ರವನ್ನು ಚನ್ನಾಗಿ ಮಾಡುತ್ತಿರಾ, ನಮ್ಮ ಧಾರವಾಹಿಯಲ್ಲಿಯೂ ಹೆಣ್ಣಿನ ಪಾತ್ರ ಹಾಕಿ ಎಂದು ಕೇಳಿಕೊಂಡರು ಇದಕ್ಕ ಒಪ್ಪಿದ ರಾಘವೇಂದ್ರ ಪ್ರಸಿದ್ಧ ಧಾರಾವಾಹಿಯಲ್ಲಿ ಹೆಣ್ಣಿನ ಪಾತ್ರ ಹಾಕಿ ಸೈ ಅನಿಸಿಕೊಂಡರು. ಇವರ ಹೆಣ್ಣಿನ ಪಾತ್ರಕ್ಕೆ ಎಷ್ಟು ಬೇಡಿಕೆ ಬಂದಿತು ಎಂದರೆ, ಬಾದಾಮಿ ಬನಂಶಕರಿ ಜಾತ್ರೆಗೆ ಇವರನ್ನು ಕರೆಸಿ ಹೆಣ್ಣಿನ ಪಾತ್ರ ನೀಡಲಾಯಿತು. ಅಲ್ಲಿ ಪ್ಯಾಟೆ ಹುಡ್ಗ್ಯಾರ ಎಂಬ ನಾಟಕದಲ್ಲಿ ಪೂಜಾ ಪಾತ್ರ ನಿರ್ವಹಿಸಿ ಭೇಷ ಅನಿಸಿಕೊಂಡರು. ಸದ್ಯ ಇವರು ಮಂಜು ಗಂಗಾವತಿ ನಿದೇರ್ಶನದ ಹಳ್ಳಿ ಹೈಕ್ಳ ಪ್ಯಾಟೆ ಲೈಪ್ ಎಂಬ ಸಿನಿಮಾದಲ್ಲಿ ಮುಖ್ಯ ಪಾತ್ರದಲ್ಲಿ ನಟನೆ ಮಾಡುತ್ತಿದ್ದಾರೆ. 

ಇವರ ತಾಯಿಯೇ ಟೈಲರ್:

ಇವರು ಹಾಕುವ ಪ್ರತಿಯೊಂದು ಹೆಣ್ಣಿ ಪಾತ್ರಗಳಿಗೂ ಇವರ ತಾಯಿ ಬಟ್ಟೆ ಹೊಲೆದು ಕೊಡುತ್ತಿದ್ದರು. ಮಗನ ಈ ಹೆಣ್ಣಿನ ಪಾತ್ರ ನಿರ್ವಹಿಸಲು ತಾಯಿಯ ಸಹಕಾರ ತುಂಬಾನೆ ಇದೆ. ರಾಘವೇಂದ್ರ ಅವರು ಮಾಡುವ ಪ್ರತಿ ಪಾತ್ರಕ್ಕೂ ಅದಕ್ಕೆ ಒಪ್ಪುವಂತಹ ಕಾಸ್ಟ್ಯೊಂಗಳಲ್ಲಿ ಅವರ ತಾಯೇ ಅಳತೆ ಮಾಡಿ ಹೊಲೆದು ಕೊಡುತ್ತಾರೆ. ನನ್ನ ತಂದೆ-ತಾಯಿ ನೀ ಹೆಣ್ಣಿನ ಪಾತ್ರಗಳಲ್ಲಿ ಮಾಡಬೇಡ ಎಂದು ಹೇಳಿದವಲ್ಲ. ನಾನು ಯಾವುದೇ ಪಾತ್ರ ಹಾಕಿದರೂ, ಅದಕ್ಕೆ ಬೆನ್ನ ಹಿಂದೆ ನಿಂತು ಪ್ರೋತ್ಸಾಹಿಸುತ್ತಿದ್ದಾರೆ. ಬಣ್ಣ ಹಚ್ಚಿದ ಮೇಲೆ ನಾವು ಆ ಪಾತ್ರಧಾರಿಗಳಾಗಬೇಕು. ಬಣ್ಣ ತೆಗೆದ ಮೇಲೆ ನಾವು ನಾವಾಗಿರಬೇಕು ಅಂದಾಗ ನಾವು ನಮ್ಮತನ ಎಂದು ಕಳೆದುಕೊಳ್ಳುವುದಿಲ್ಲ. ಹೆಣ್ಣಿನ ಪಾತ್ರ ಹಾಕಿದ ಮಾತ್ರಕ್ಕೆ ಯಾರು ಕೀಳಾಗಿ ನೋಡುವ ಅವಶ್ಯಕತೆ ಇಲ್ಲ. ಏಕೆಂದ್ರೆ ಹೆಣ್ಣಿನ ಪಾತ್ರ ನಿರ್ವಹಣೆ ಮಾಡುವುದು ಎಷ್ಟೊಂದು ಕಷ್ಟ ಇದೆ ಅಂತ ನಟನೆ ಮಾಡುವವರಿಗೆ ಗೊತ್ತು. ನಾನು ಹೆಣ್ಣಿನ ಪಾತ್ರಗಳಲ್ಲಿ ಹೆಣ್ಣು ಕೂಡಾ ನಾಚುವಂತೆ ನಟನೆ ಮಾಡುತ್ತೇನೆ ಎಂದರೆ ಅದು ನನಗೆ ದೇವರು ಕೊಟ್ಟ ವರ. ಇದರಲ್ಲಿ ಯಾವುದೇ ಕೀಳರಿಮೆ ಇಲ್ಲ ಎಂದು ಹೇಳುತ್ತಾರೆ ರಾಘವೇಂದ್ರ.